O Choupín dixital
A revista do IES Carlos Casares de Viana do Bolo

domingo, 23 de marzo de 2014

Adeus a un mito

(>>)
Carlos F. | Hoxe, 23 de marzo de 2014, deixounos o que foi primeiro Presidente electo democraticamente na Historia recente de España e principal artífice do chamado “proceso da Transición” do noso país.


Adolfo Suárez, coas súas contradicións e os seus erros, supuxo un exemplo de home de Estado, afastado das carnicerías e as guerras sucias políticas que tanto vemos hoxe no ámbito da nosa vida pública. Pagou un prezo moi caro por tratar de manter un equilibrio entre os distintos extremismos ideolóxicos da época. Denostado pola dereita e extrema dereita, que o consideraba un traidor á herdanza franquista; criticado tamén pola esquerda, que entendía que os seus cambios eran insuficientes e desconfiaban da súa procedencia do réxime dictatorial.

Neste país, tan cainita e guerracivilista, sería desexable que actitudes e talantes coma o seu volvesen a liderar o espazo político. Curiosamente, moitos dos que estes días louvan a súa figura foron inmisericordes cos ataques cara él, mesmo no plano persoal. O camiño cara a un rexime democrático e o respecto absoluto ás opinións e liberdades alleas, que hoxe ás veces semellan cuestionadas, debémosllo a él. Como definiu nun dos seus discursos “deseo elevar a la categoría política de normalidad, lo que en la calle es simplemente normal”. Na novela de Javier Cercas, Anatomía de un instante, faise un retrato fermoso, xusto e rigoroso da súa figura. GRAZAS, PRESIDENTE.

mércores, 19 de marzo de 2014

Continúa a V semana da orientacion

Na xornada de onte, tivo lugar outra das actividades de información ao alumnado enmarcadas nas V Xornadas da Orientación. Desta vez, María Agrafojo, do Centro Superior de Hostelería de Galicia, aclarou unhas cantas dúbidas ao alumnado interesado nas saídas profesionais que este centro oferta.


luns, 17 de marzo de 2014

Saúde sen alcol nen malos fumes

Ovidio V. | Hoxe tivemos a oportunidade de traballar coas dúas Compañeiras do SERGAS Purificación Novoa e Pilar trabazo, que nos aportaron o seu punto de vista sobre dous factores que agravan considerablemente o noso estado de saúde, e que son, respectivamente, as actuais tendencias de consumo de alcol e o tabaquismo.




Os grupos que traballaron estes contidos foron os de 3º de ESO (programa Adicións II: alcol) e 1º de ESO (programa Clases sen Fume).

venres, 14 de marzo de 2014

Lisboa...

Noemí O. | Unha viaxe, un destino, Lisboa. Un ano máis a saída de Bacharelato levouse a cabo con gran éxito, durante os dias 8, 9, 10 e 11 de Marzo. Pode ser que un non se poida namorar dunha cidade, pero creo que en Lisboa todos nos sentimos así. 

Santuario de Panoias, visita do primeiro día

Posiblemente dos lugares máis bonitos que nunca visitamos, coas súas vistas, os seus castelos, as súas prazas e miles de cousas que poder visitar e desfrutar. Unha viaxe que, acompañados de cinco dos nosos profesores, se nos quedou máis curta do que esperabamos. Catro días, tres noites e unha experiencia increíble. Cada lugar que visitamos, máis bonito que o anterior, máis agradable e cada un dos paseos polas rúas, pola praia ou polas prazas lograba transmitirnos unha sensación agradable e de tranquilidade. Dende as visitas aos diferentes museos, os paseos por Sintra e Cascais, a visita ao xardín botánico... 

Estufa Fria

Todo un tanto especial. Quizáis se tivesemos que describir como foi esta saída dixesemos que quedamos con gañas de volver, completamente alucinados con aquelo todo. Chegando aínda algo cansos da viaxe, non dubidamos en ver todos e cada un dos recunchos, cada un dos lugares, emocionados sacando fotos e desfrutando ao máximo sempre. O primeiro dos días fixemos unha pequena parada, cunha visita ao Santuario de Panoias en Vila Real, onde puidemos desfrutar do bo tempo e aprender sobre as orixes deste fermoso lugar. Tras a posterior deixada das equipaxes no albergue desfrutamos de paseos pola beira da praia e das vistas de Lisboa. Posteriormente, o segundo dos días, visitamos o Museo Calouste Gulbenkian, onde ollamos dende cadros e pinturas ata obxectos de diferentes lugares, e figuras antiquísimas.

Museo Gulbenkian

Logo, a visita a Torre de Belem, un lugar increíble, ao igual que o Museo do Ar, onde logo nos achegamos, disfrutando de diferentes avións, helicópteros e todo o que tiña que ver o mundo aéreo.

Museo do Ar

O terceiro día, visitamos o Jardim Botanico, no que as diferenzas de adaptación dunhas plantas as outras eran considerablemente notables, foi un agradable momento de natureza. Dende logo, outra das visitas, quizáis das máis bonitas, foi a do Castelo de Sao Jorge, dende onde disfrutamos da posta de sol, coas vistas máis alucinantes que posiblemente se poidan ver en Lisboa. Rematamos, o cuarto día cun agradable paseo por Guimaraes, coñecendo o lugar e os seus castelos.

En Guimaraes

Quizáis unha das mellores saídas que tivemos feito, disfrutándoa ao máximo e con unha sensación increíble de ter visitado esa cidade. Tras chegar, realmente agotados, so pode quedar isto como unha experiencia máis, uns recordos e uns días perfectos en compañía de todos. Claramente, e sen ser esaxerada, namorados de Lisboa e de todo o vivido alí durante eses días.

Sao Jorge

Chez moi

Les élèves de 2º ESO ont préparé des vidéos pour présenter leur maison, et bien sûr, en FRANÇAIS!!!!



Actúa con coidados

Neste intre está tendo lugar no noso IES a continuación da campaña "Actúa con coidados" de InteRed. Concretamente, é o grupo de 4º de ESO quen vén desenvolvendo traballos referentes a dita campaña e quen hoxe debate sobre o tema priorizado en anteriores xuntanzas: a violencia de xénero. O reto que este grupo ten agora por diante é organizar unha campaña de sensibilización tanto para a comunidade educativa coma para o resto da bisbarra.

Alumnado de 4º de ESO con Paz Caínzos

Semana da Prensa

Habitualmente, varios grupos do noso IES traballan unha vez por semana coa prensa. Estase a converter nun hábito consultar o xornal a diario, xa que sempre hai dispoñibles varias copias no corredor principal do centro. Ademais, esta semana o Grupo de Biblioteca organizou unha exposición con xornais de todo o mundo, para a consulta de calquera persoa interesada en coñecer un país determinado a través da súa prensa.

Un grupo de alumnas de 4º de ESO ollan varios xornais internacionais

venres, 7 de marzo de 2014

Día da Muller

O. Villar | Ao coincidir en sábado o 8M, hoxe conmemoramos o día da Muller no IES Carlos Casares. Lonxe de rexeitar o tópico "non debera ser un día, senón todos", vemos esta xornada como un espazo de reflexión sobre a nosa situación actual, como un momento de opinión, coñecemento e oportunidade de compartir e construír na busca dunha sociedade igualitaria e respectuosa en cuestión de xénero.

Un momento de reflexión co alumnado de 1º de ESO

Durante toda a xornada acompañounos Ana García, amiga, alumna, profesora en moitas ocasións e voluntaria do noso IES. A través de tres interesantes documentais, o alumnado de 1º, 2º e 3º de ESO analizou as diferentes situacións desfavorables que moitas mulleres están a vivir no mundo.

Momento de traballo en grupo en 3º de ESO

Ana traballando co grupo de 2º de ESO

Os grupos de 1º de ESO traballaron o documental "Binta y la gran idea", o de 2º de ESO visionou "¿El sueño imposible?" e os de 3º de ESO fixo o propio co documental "Mujeres liderando sus vidas y procesos". Logo de cada un dos pases, o alumnado realizou reflexións e postas en común a través de pequenos grupos de traballo, chegando a conclusións tan interesantes como "para atopar desigualdades de xénero non hai que ir moi lonxe" ou "a clave para acadar a igualdade é unha boa educación". Podemos dicir que este conxunto de actividades foi un éxito visto o excelente nivel de participación de mozas e mozos.

Autoestima e Risoterapia

O. Villar | Hoxe o alumnado de 4º da ESO participou nun obradoiro orientado a coñecerse e respectarse a un mesmo como punto de partida para unha relación satisfactoria co resto da sociedade. A través de técnicas de traballo como a risoterapia, o alumnado de maior idade da ESO participou neste taller levado a cabo pola Cruz Vermella.

Presentación do taller na Aula Xesús R. Jares (Imaxe: M. Ulloa)

xoves, 6 de marzo de 2014

Continúa a V Semana da Orientación

Esta mañá tiveron lugar no salón de actos "Xesús R. Jares" dúas actividades enmarcadas na V Semana da Orientación, inaugurada xa no mes de febreiro e adicada á orientación académica e profesional do alumnado de 4º de ESO e Bacharelato. Hoxe acompañáronnos Beatriz González, da Universidade Europea de Madrid, e Constantino López e Juan Pita, respectivamente do Corpo Xeral da Armada e da Infantería de Marina de Ferrol.

Un momento da charla da UEM

Un momento da charla da Armada e Infantería de Marina

Ao final das exposicións tivo lugar un momento especial, cando o representante da Armada entregou á alumna de Bacharelato Anduriña O. B. o premio que obtivo recentemente na fase autonómica do concurso "Carta a un militar español".

Anduriña recollendo o seu premio