O Choupín dixital
A revista do IES Carlos Casares de Viana do Bolo

martes, 29 de abril de 2014

O noso futuro, a nosa opción

Monse U. | A principios do mes de abril todos os alumnos do centro e os alumnos dos últimos cursos do CEIP Bibei grazas á exposición cedida polo CEIDA “O noso mundo, o noso futuro, a nosa opción” e un vídeo didáctico, puideron coñecer o problema ambiental do cambio climático, as súas causas, como o home contribúe a agravalo, as súas consecuencias a nivel mundial e en Galicia, e como nós de modo individual e os gobernos podemos axudar a intentar diminuír esta problemática.


Grazas a ela sabemos máis sobre o efecto invernadoiro e os gases que provocan o seu aumento, coñecemos o Protocolo de Kyoto...

Ampliación de prazo

O Departamento de Matemáticas vén de ampliar o prazo de presentación de traballos ata o 15 de maio, incluído. As votacións on line poderán realizarse do 22 ao 31 de maio, ambos incluídos.

Moita sorte!

Vota!!!

Abriuse xa o prazo para a votación de filmes no Festival Olloboi 2014. O noso centro preséntase coas producións "Lipdub Camiñante" e "Grease vs Thriller". Para votar, preme no seguinte enlace:

luns, 28 de abril de 2014

Dúas interesantes charlas coa Garda Civil

Hoxe pola tarde, o alumnado de 1º e 2º de ESO participou en dous talleres impartidos por Paco e Fernando, axentes da Garda Civil, dentro do Plan Director para a Convivencia e a mellora da seguridade nos centros educativos e nas súas contornas. O primeiro dos talleres estivo adicado aos perigos en internet, e fundamentalmente orientado á prevención ante prácticas como pode ser o ciberbullyng ou o sexting. Durante o segundo taller, o alumnado reflexionou sobre os perigos que conleva o consumo de substancias tóxicas para o organismo como poden ser o alcol, o tabaco e outras drogas.



Agradecemos aos axentes que nos acompañaron esta tarde a súa labor, sin a cal sería complicado chegar á xuventude con información, ideas e consellos fiables e de última xeneración.

II Encontro de Centros para unha Convivencia Positiva

Noemí O. | Os pasados días 24 e 25 de Abril, acompañadas por dúas das profesoras do noso centro, Monse e Uxía, asistimos a Santiago de Compostela co motivo do segundo encontro de mediadores. Unha convivencia na que coincidiamos un total de 22 centros de ensinanza secundaria de varios puntos de Galiza.

Nerea, Monse, Noemí e Uxía

Ao chegar, tras a recollida do material, asistimos á presentación e á benvida a este encontro, no que se nos presentaron moitas oportunidades nas que enriquecernos como mediadores/as. De seguido, elaborouse un espazo aberto cun total de dez grupos nos que os temas eran totalmente diferentes, falando de cómo contribuiriamos nós dende o noso centro para unha convivencia positiva. Un tipo de talleres, nos que a comunicación entre alumnos, profesores e pais/nais se fomentou e tratou de reforzar, expoñendo os nosos puntos de vista e chegando a unhas conclusións. Tras este espazo, tocoulle o turno aos xogos, a poñer en práctica a nosa cooperación e a quitar a vergoña, tratando de sacar o máximo partido ao encontro e a interactuar cos demais.

Tras a cea e a repartición de habitacións, chegou a hora da noite, no que acompañados de xogos, música e bailes, pasamos un rato increíble xunto con todos.

O Venres, desprazámonos ao IES Antonio Fraguas no que disfrutamos de tres tipos de obradoiros, relacionados co acoso e temas de mediación e discriminación. Un dos talleres, trataba sobre a prevención do acoso, o que foi realmente interesante, adquirindo valores e coñecementos. Neste taller escribimos mensaxes (entre outras actividades) que serían enviadas a nenos/as que sufrían acoso. Outro deles, relacionado co teatro, no que o grupo deste centro nos representou unha obra que nos mostraba a discriminación, e a continuación un debate sobre esa mesma. O último dos talleres era de radio, no que tivemos que realizar unha serie de anuncios sobre diferentes temas.

Finalmente, tras a despedida, a entrega de diplomas e as fotos grupais tomamos camiño a Viana, levando connosco unha experiencia única, na que os nosos coñecementos se ampliaron considerablemente.

Tomo o momento para animar a todas aquelas persoas do centro que non son mediadores/as a realizar esta formación e poder asistir a este tipo de encontros nos que poder pasalo ben, á vez que aprendemos aspectos de moito interese na vida actual. Facendo todo isto, coa esperanza de axudar a quen o necesite, así como ser mellores persoas.

Salvavidas 2014

O pasado xoves, o alumnado de 3º de ESO e 1º de Bacharelato participou nunha interesante actividade enfocada cara á importancia das doazóns de órganos en canto a salvar vidas se refire. Neste taller enmarcado no proxecto Salvavidas (Plan Proxecta), analizáronse estatísticas tan reais e abraiantes coma que é catro veces máis probable precisar un órgano que animarse a doalo.


domingo, 27 de abril de 2014

Salvavidas

Jesús B. | O día 24 de abril tivo lugar unha charla no instituto sobre doazón e transplantes de órganos. Visitáronnos unha enfermeira e unha paciente trasplantada de fígado. Á charla asistiron os cursos de 3º ESO e 1º de BAC.


Na charla tratáronse os diferentes aspectos da doazón de órganos: a coordinación entre hospitais a través da ONT (Organización Nacional de Transplantes), o altruísmo da doazón… A paciente trasplantada contounos a súa experiencia, e o seu agradecemento á persoa (anónima) de quen recibiu o órgano.

Seguimos a traballar en xénero

Dentro da campaña Actúa con Coidados que a ong InterEd está a desenvolver no noso IES, segue a traballarse a igualdade de xénero e a tolerancia cero en canto a violencia de xénero (e doutros tipos) se refire. Desta volta, foi Sara, do CIM de Viana do Bolo (Centro de Información á Muller, do Concello) quen o pasado xoves desenvolveu diferentes contidos a través dunha interesante presentación interactiva.


xoves, 17 de abril de 2014

Gabriel, único

Fonte imaxe >>
Carlos F. | Hoxe, 17 de abril de 2014, deixounos o que, sen dúbida, pode considerarse o mellor novelista hispanoamericano de todos o tempos, e o pai do chamado "boom" da narrativa hispanoamericana, que elevou as letras de América Latina a unha cota inigualable de lectores e seguidores nas décadas de 1970 e 1980. 

Coa súa cidade literaria de Macondo, territorio da obra mestra Cien años de soledad, establece un espazo para a utopía que queda como símbolo da maxia, o soño e a liberdade. Outras novelas como El amor en los tiempos del cólera, que no seu ano de publicación vendeu en EEUU máis exemplares que ningunha outra obra de autor norteamericano, o El coronel no tiene quien le escriba, sitúanse no máximo exponente da narrativa en castelá do século XX.

Pasarán moitos anos para que alguén ocupe o seu espazo nas letras hispánicas. Non podo terminar este recordo sen unha reflexión persoal emocionada. Se hoxe me adico a ensinar literatura, ten moito que ver a lectura de Cien años de soledad nun verán de hai xa moitos anos. Ata sempre, Gabo.

mércores, 16 de abril de 2014

CME 2014 no IES Carlos Casares

Pedimos unha educación inclusiva, e nestes últimos anos un dos camiños para facernos escoitar é a Campaña Mundial pola Educación. Este ano a CME repara nas barreiras que aínda separan ás persoas con discapacidades do sistema educativo.


Logo da participación no acto central da campaña de 2014 na sé do Valedos do Pobo en Santiago de Compostela o pasado 10 de abril, o pasado venres tivemos no Carlos Casares de Viana un acto no que reivindicamos o dereito a unha educación de calidade para todas e todos.


O alumnado da ESO estivo pendente durante preto de hora e media do que o Voluntariado do IES Carlos Casares, Educación sen Fronteiras e ASFAVAL nos contaron: as experiencias en anteriores campañas no centro, a xornada do 10 de abril en Santiago, a importancia de reivindicar unha educación inclusiva e a labor que institucións como ASFAVAL veñen desenvolvendo en relación á axuda a persoas con discapacidades.

Agradecemos a todas e todos a vosa presenza neste acto.

luns, 14 de abril de 2014

Semana Mundial pola Educación

O pasado xoves 10 de abril celebrouse en Santiago de Compostela, concretamente na sé do Valedor do Pobo, o acto central da Campaña Mundial pola Educación. Este ano, a SAME (Semana de Acción Mundial pola Educación) celebrouse do 7 ao 13 de abril, e o eido de traballo foi a integración de persoas con discapacidades, concretamente no ámbito educativo. Diferentes centros educativos e asociacións transmitiron a José Julio Fernández, Valedor do Pobo, as súas inquedanzas na loita por un ensino inclusivo.

Foto de grupo

Por parte do IES Carlos Casares acodiron a este acto o Vicedirector Ovidio Villar Marcos e o antigo alumno e hoxe voluntario Brais Seoane Villasante. Nunha entrevista para a TVG, Brais indicou a importancia de que todas e todos aportemos o noso gran de area para que as actuais barreiras que aínda existen vaian desaparecendo.

Link á nova na web do Valedor do Pobo
Link á nova na CRTVG



sábado, 12 de abril de 2014

Hai negocio nas redes sociais?

Isto foi o que Luis Ulloa, onte venres 11 de abril, debateu co alumnado de 4º de ESO e Bacharelato. Quen non coñece "twitter" ou "facebook"? Hai algo máis alá da comunicación entre grupos? É posible abrirse un oco no mundo empresarial a traves das redes sociais? En boca do propio público asistente, unha interesante e moi útil ponencia.

venres, 11 de abril de 2014

Obradoiros da DXT

Durante a mañá de hoxe tivemos a visita da DXT de Ourense. Sinda, Norberto e Juan traballaron co alumnado da ESO e Bacharelato en diferentes temáticas referentes a unha conducción segura. Os grupos de 1º, 2º e 3º de ESO visualizaron e comentaron a curtametraxe "Entreparadas", interpretada entre as diferentes paradas dos buses da capital ourensá por persoas con algún tipo de discapacidade. Esta actividade profunda non só na importancia de evitar accidentes de tráfico, senón tamén no feito de traballar por unha sociedade inclusiva para todas as persoas.

Sinda Aguiar, durante a presentación de "Entreparadas"

Os grupos de 4º de ESO e 1º e 2º de Bacharelato, máis próximos a idade de obtención dos diferentes permisos de conducir, analizaron a inquedante presenza de alcol e outras substancias alucinóxenas nos diferentes test que os axentes de tráfico realizan a diario nas nosas estradas. Unha realidade que ten que mudar.

Observade a importancia de levar o chaleco!

Agradecemos á DXT a súa presenza, traballo e aportación de material ao noso IES, o que xa dende hai tempo ten unha importancia e continuidade ben valoradas por parte da comunidade educativa.

Información sobre ciclos

Seguindo coas xornadas da V Semana da Orientación, onte venres recibimos a visita do IES Xermán Ancochea Quevedo, de Pobra de Trives, que presentou ao alumnado de 4º de ESO e 2º de Bacharelato a súa interesante oferta de ciclos medio e superior de Electricidade e Electrónica. 

Un camiño que algún alumno do noso centro xa emprendeu nestes últimos anos.

xoves, 10 de abril de 2014

Visita de Museos en Ponferrada

A saída educativa de onte, mércores 9 de abril, a Ponferrada, converteuse nunha das máis satisfactorias e innovadoras que temos feito nos últimos tempos no noso centro. O día comezou cun percorrido didáctico de máis dunha hora polas instalacións do Museo Nacional da Enerxía, onde mediante unha serie de explicacións excelentes da nosa guía Judith, o material interactivo e a propia visións das instalacións o noso alumnado observou o pasado, presente e futuro do carbón e a obtención de electricidade nunha central térmica. As rapazas e rapaces elaboraron ademáis de xeito excelente unha ficha de contidos sobre a visita, e quédanos a lembranza dun dos museos científicos mellor organizados que temos visto.
No Museo da Enerxía
Ao mediodía chegou o turno do Museo da Radio Luis del Olmo, onde ademáis de contemplar unha das mellores coleccións mundiais de aparellos de radio e unha fonoteca con documentos sonoros que son xa parte da historia de España, o alumnado de 4ºB gravou en directo un programa de radio que en breve estará á disposición de todos no Choupin. Polo tanto os nosos estudantes foron por un día improvisados locutores...

Gravación no Museo da Radio

Tras o xantar, visitamos o Castelo dos Templarios de Ponferrada, no que desfrutamos dunha mostra de traxes de oficios medievais, a exposición Templum Libri, con mapas e manuscritos de gran valor, e, como non ,un breve paseo polas murallas da fortaleza defensiva da vila.

Foto de grupo

Xa por último un breve paseo libre polo casco histórico e a Ribeira do Sil deu fin a unha xornada que destacou polo carácter ameno e o excelente comportamento do alumnado. Ate a próxima, Ponferrada!

luns, 7 de abril de 2014

O mundo que queremos

Un grupo do IES Carlos Casares, integrado por alumnado do primeiro ciclo da ESO, vén de asistir o pasado 4 de abril a unha xuntanza de centros participantes no proxecto "Cooperación Galega: o mundo que queremos". Máis de cincocentos rapaces e rapazas se reuniron na Sala Capitol de Santiago de Compostela para compartir o traballo feito durante este ano e asistir a un concerto de Hip-Hop.

O grupo durante o concerto na Sala Capitol

Camiñando pola chuviosa Compostela

venres, 4 de abril de 2014

Nace unha emisora

O alumnado de 2º de ESO vén de crear o primeiro programa de radio da emisora do noso centro, un proxecto que día a día toma máis forza. Esta actividade está enmarcada no Plan Proxecta, concretamente no ámbito do programa Cooperación Galega: o mundo que queremos, e neste primeiro podcast aparecen interesantes reflexións sobre os obxectivos do milenio.

xoves, 3 de abril de 2014

Ata sempre, Carmen

No día de onte, 2 de abril, recibimos a durísima noticia do pasamento de Carmen García Nieto, traballadora social do Concello de Viana do Bolo, e natural do veciño concello de A Mezquita. Tras unha longa enfermidade, Carmen déixanos un regueiro de lembranzas positivas no seu traballo a prol da educación na bisbarra.

Carmen, no centro, durante a recollida dun premio a un alumno do IES

Agólpanse agora na memoria moitas tardes nas que compartimos cursiños de formación, charlas sobre os problemas e dificultades no noso traballo cotiá, aos que Carmen enfrontaba sempre cun gran sentido do humor. Para os que xa levamos un tempo no centro e a coñeciamos ben é un forte golpe, do que só nos queda repoñernos co exemplo. Sei que desde Bogotá e Bermejo haberá tamén recordos para ela, e dende o IES Carlos Casares só nos resta sumarnos á dor da súa familia e enviarlles unha aforte aperta. Ata sempre, Carmen!

mércores, 2 de abril de 2014

Radio Tehuacán

O. Villar | Acompañáronnos esta mañá Jasmin, José Manuel e Iris, case recén chegados dende El Salvador para presentarnos un proxecto xenial, altruísta e valente. Contra vento e marea, contra unha sociedade non libre (o medo coarta a liberdade), transmiten á súa comunidade a idea de que un mundo mellor é posible. A través das ondas dun programa de radio (Radio Tehuacán), traballan dende a importancia da igualdade de oportuinidades ata o valor da cooperación. Son voluntarios e voluntarias e teñen moi clara a importancia da súa tarefa.


Esta interesante proposta chéganos da man de Paula Rojas e no marco do proxecto Cooperación Galega: o mundo que queremos, e terá continuidade en Santiago de Compostela o vindeiro catro de abril, nun encontro de todos os centros que participan nesta actividade do Plan Proxecta. Participaron 1º e 2º de ESO.

martes, 1 de abril de 2014

Exposición sobre o Cambio Climático

O corredor principal do IES Carlos Casares acolle estes días a exposición "Cambio climático, o noso mundo, o noso futuro, a nosa opción". Forma parte das exposicións itinerantes do CEIDA e permanecerá aberta ao público ata o vindeiro 11 de abril. 

Animamos a todas aquelas persoas interesadas en materia de xestión de recursos, sostibilidade e ecoloxía a facernos unha visita.