O Choupín dixital
A revista do IES Carlos Casares de Viana do Bolo

domingo, 28 de abril de 2013

Encontro pola paz

Nova Escola Galega rende homenaxe a Xesús R. Jares en Viana do Bolo

No marco do XXVII Encontro Galego-Portugués de Educadores pola Paz, tivo lugar este domingo 28 de abril en Viana do Bolo, unha homenaxe a Xesús R. Jares, vianés referente a nivel internacional dos movementos de renovación pedagóxica e de Educación para a Paz, falecido en 2008.


O acto consistiu na colocación dunha placa na súa casa natal, que lembra o seu traballo a prol da Educación e en defensa da Paz, e foi descuberta pola mestra vianesa Beatriz Santos. Esta lembranza supuxo o peche das xornadas, xunto coa solta da Pomba, desde a Praza Maior, que, de xeito habitual, se ven a facer nos Encontros anuais desta organización.

xoves, 25 de abril de 2013

I Congreso Re-Acción

O grupo de 4º A do noso IES participou o pasado día 23 nun congreso científico en Santa Cruz (Oleiros, A Coruña). Nun marco incomparable, o Castelo de Santa Cruz, sé da entidade organizadora (CEIDA), dito grupo amosou o seu traballo "Coida o que tes" ante máis dun centear de persoas, fundamentalmente alumnado e profesorado doutros centros participantes.


O proxecto elaborado polo PDC de cuarto contempla o coidado do material e a xestión de resíduos no noso centro na bisbarra. É fundamentalmente un proxecto de divulgación, e para a súa execución leváronse a cabo actividades como o reconto de contenedores da zona, charlas noutros centros educativos próximos, elaboración de papeleiras específicas ou deseño de carteis e pegatinas animando a separar para reciclar.


O grupo, ademais de estar acompañado por compañeiras e compañeiros de 3º de ESO do Carlos Casares, contou coa presenza, cariño e apoio de Amalia Álvarez, Delegada de InteRed Galicia, e persoa benquerida pola nosa comunidade.




Congreso de Educación pola Paz

Aquí está o programa do Encontro Galego de Educadores pola Paz, que este ano ten lugar na nosa localidade durante os días 26, 27 e 28 de abril.

luns, 22 de abril de 2013

Exposición de pintura

José F. | Exposición temporal itinerante de láminas e carteis de coñecidas obras do museo do Prado na entrada do instituto. Obras de Velazquez, Durero, El Bosco, Goya... que podemos desfrutar estes dias no IES e serven de apoio ao desenvolvemento das competencias básicas. Colaboran os departamentos de Debuxo e Historia. Proximamente viaxarán aos CEIP de Viana e Vilariño de Conso, centros cos que se comeza un  intercambio de fondos de láminas de arte.

Debatendo sobre a crise

O pasado día 15 de abril tivo lugar no IES Carlos Casares unha interesante mesa redonda para profundar na actual crise económica, tanto nas súas orixes, consecuencias e posibles saídas, coma en aspectos cíclicos que poidan aparecer ao longo da historia. O público, alumnado de Bacharelato, animouse a participar e debater con Bieito Seivane e Federico Méndez (profesores de Xeografía e Historia), Clara Vizcaya (profesora de Economía) e Juan Carlos López e Octavio Seoane (representantes da banca), quedando con gañas de repetir noutra ocasión temática e formato.


sábado, 20 de abril de 2013

Hipertensión non, grazas

David P. | Como xa sabedes, o pasado luns 8 de abril celebramos o Día Mundial da Saúde, adicado, neste ano, á hipertensión arterial (HTA).

venres, 19 de abril de 2013

Día do Pobo Xitano

O pasado 8 de abril conmemoramos o Día do Pobo Xitano, coa presenza na mesa de conferencias do IES Carlos Casares de Benjamín, Remedios e Antonio, integrantes da familia Jiménez Vargas, e excelentes representantes da súa etnia. Foi unha boa ocasión para achegarse máis a esta cultura e así podela valorar.

xoves, 11 de abril de 2013

Coida o que tes

Coida o que tes é un proxecto de divulgación sobre o coidado da nosa contorna, tanto no aspecto material coma no natural. Este traballo, levado a cabo polo alumnado de 4º de PDC do IES Carlos Casares, promove a xestión dos propios resíduos, primeiramente, co compromiso persoal de non tirar lixo e de observar se se tira e onde, para, a continuación, actuar a través dunha serie de actividades, como xogos interactivos, talleres de reciclaxe de papel ou ánimo a practicar as 3R mediante carteis que invitan a ser máis coidadosos co medio ambiente.


Israel, Antonio e Bran no Bolo
Pablo, Iván e Pedro na Gudiña
Jonathan, Jairo, Jenifer e Susana na Veiga


No marco deste proxecto e da Campaña "Actúa con coidados" da ONG InteRed, os rapaces e rapazas de 4º A veñen de compartir estes valores en tres centros educativos próximos a Viana do Bolo, aos cales agradecemos o seu acollemento. Son os CEIP da Veiga e do Bolo e o CPI da Gudiña. Divididos en tres grupos, adicaron a mañá do pasado día 10 a traballar con nenos e nenas en materia de redución, reutilización e reciclaxe de resíduos (as 3R). Unha marabillosa experiencia, que todo o grupo, sen dúbida, agarda repetir. A ocasión, o próximo 23 de abril na Coruña, no edificio do CEIDA, organismo que seleccionou este traballo para participar no I Congreso ReAcción sobre a xestión do lixo.

Fai clic aquí para obter toda a información e novidades deste interesante proxecto.

martes, 9 de abril de 2013

Xovenes e Tráfico

Carlos F., Ovidio V. | O pasado 5 de abril tivo lugar no Carlos Casares, como cada ano, un interesante e importante obradoiro. Baixo o título de "Xóvenes e Tráfico", Sinda Aguiar e David Llorente, da Xefatura Provincial de Tráfico de Ourense, achegaron ao alumnado de 4º de ESO e Bacharelato aspectos actuais sobre a lei de tráfico, mensaxes visuais sobre a incidencia do alcol na estrada e mesmo vídeos reais de accidentes que ben se podían ter evidados.



Dende o IES Carlos Casares agradecémosvos a labor de difusión que levades a cabo sobre un tema que, por moito que melloremos, segue a provocar a morte de demasiadas persoas na estrada.

luns, 8 de abril de 2013

Campo a través e futbiño

Pablo C. | O derradeiro día do trimestre pasado, o alumnado do centro participou na fase local nun campionato de fútbol sala na Gudiña. O equipo da Gudiña ganou ao noso centro na categoría cadete, e o IES Carlos Casares gañou na categoría infantil. Grazas a todos por participar.


Por outra banda, O alumnado de Viana participou nos campionatos de campo a través en tres fases de competicións: o equipo cadete masculino foi á fase local, onde participaron: Iago Macía, Jonathan Macía, Borja Monteagudo e Juan Bembibre. Este dous últimos foron á fase provivial, a Ourense, onde Juan Bembibre quedou 6º e clasificouse  para o Campionato galego que se celebrou en Guitiriz. No campionato galego quedou de 25, clasificación que promete no seu primeiro ano como cadete. No campionato provincial participaron as cadetes: Irea Rodríguez Cañueto, Joëly Fernández Vuilly e Uxía Fernández Guerra. Na fase local, ademais dos citados, participou o alumnado de primeiro curso: Joëly Fernández Vuilly, Uxía Fernández Guerra e Diego Rodríguez Moya. No campionato provincial quedou primero na súa categoría o alumno Damián Anta, representando ao seu clube o A.D.A.S. Moitas gracias a este alumnado pola súa participación.

Ensinando primeiros auxilios ao profesorado

Pablo C. | O alumnado do ciclo impartiu un curso de primeiros auxilios para o profesorado do Carlos Casares o pasado día 28 de marzo.

Realización dunha manobra
O contido foi, fundamentalmente, a manobra RCP (reanimación cardiopulmonar). O profesorado recibiu instrucións e fixo prácticas sobre a RCP en distintas situacións: con adultos, con nenos, con lactantes e con afogados. Así mesmo o alumnado impartiu contidos de forma teórico-práctica relacionados con outras importantes situacións de emerxencia: manobra ante atragantamentos (Hemlich), afastar a persoas inconscientes de perigos como os incendios (manobra de Rautek) así como outras formas de desprazamento ante situacións de emerxencia. Moitas grazas a todos por participar no curso, tanto ao persoal docente como discente.