Novo director no IES Carlos Casares

O pasado 1 de setembro de 2012, por decisión da Xefatura Territorial da Consellería de Cultura e Educación Universitaria de Ourense, tomou posesión como director e presidente do Consello Escolar do IES Carlos Casares de Viana o profesor Don Carlos Ferreiro González, do Departamento de Lingua Castelá e Literatura.

Carlos Ferreiro é doutor en Filoloxía pola Universidade da Coruña. A súa carreira científica está claramente marcada pola Literatura Hispanomaericana, especialmente vinculado á chilena, onde tivo varias estancias en distintas universidades do país sudamericano. Ademais é autor de varios traballos sobre literatura, ademais da súa tese doutoral, e, máis en secreto, de obra poética que sempre rexeita de compartir. Oxalá se anime a compartila.

Carlos leva dez cursos como docente no IES Carlos Casares de Viana do Bolo. Neste tempo ten ocupado os cargos de docente en todos os cursos e programas de atención á diversidade, titor, xefe de estudos con Miguel Ángel Arranz e vicedirector con Luis Fernández. Vinculado sempre directamente a todos os proxectos de renovación pedagóxica do centro (educación ao consumidor e consumidora, inclusión educativa por xénero, cooperación coa UE Timoteo Rondales de Bolivia, intercambio con Chequia, mediación escolar, voluntariado, biblioteca, novas tecnoloxías...), o IES Carlos Casares conta cun director que sabe estar a "pé de obra".

Deixo para o final o principal, para que o seu traballo teña un éxito seguro. Excelentes cualidades humanas, marcadas pola sensibilidade, a empatía, un espíritu permanente de convivencia e, sobre todo, saber poñerse na realidade social e persoal de calquera dos alumnos e alunas de Viana da Bolo, A Veiga, Vilariño ou A Gudiña, que cada día chegan ás nosas aulas.

Carlos, ánimo e moita sorte.

Luis Fernández López