Reunión co presidente da Fundación Cipri Gomes

Esta semana tivo lugar no IES Carlos Casares de Viana do Bolo unha reunión de presentación entre o instituto e a Fundación Cipri Gomes, que leva un tempo desenvolvendo proxectos do máximo intererese para o futuro de Viana do Bolo. Ciprinao Gomes Esteves, presidente da Fundación, explicou á secretaria e ao director do centro cales son os fins e liñas de actuación da entidade. Víronse posibilidades de colaboración no futuro e analizouse a posibilidade de que exista un centro de tecnificación deportiva no antigo instituto de Viana, hoxe utilidado pola Fundación. Moito ánimo, que será moi bo para todas e todos.

Parabéns do Conselleiro

O Conselleiro de Cultura, Educación e Ordenación Universitaria, Jesús Vázquez Abad, vén de dirixirse ao IES Carlos Casares de Viana do Bolo para felicitar á comunidade educativa por ter resultado finalista no Premio á Acción Maxistral 2012 pola comunidade de Galicia. A fase final terá lugar en setembro.

Documento orixinal

O IES Carlos Casares finalista no Premio á Acción Maxistral

O IES Carlos Casares de Viana do Bolo acaba de ser seleccionado coma finalista da Comunidade Autónoma de Galicia para o Premio de Acción Magistral 2012, polo proxecto ?A participación cidadá, enerxía para unha senda?.

Viaxe ás Cíes co Quero Máis

Os días 3, 4 e 5 de xullo de 2012, un grupo de alumnas e alumnos de 4º de ESO e do programa de atención á diversidade cara a excelencia "Quero Máis", do Contrato-Programa, viaxaron ao Parque Natural das Ilas Atlánticas (Illas Cies), acompañados polos profesores Luis Felipe Crende, Luis Fernández, Carlos Ferreiro e Pablo Cuervo. Tamén nos acompañou o técnico en actividades físicas e deportivas, Alexandre Crende, que organizou diversas actividades de lecer na praia, que nos fixeron desfrutar xuntos.  Tamén compartiron as xornadas con nós, dous amigos do instituto de Viana, Gael e  Lucía, que foron uns estupendos fotógrafos, e que ahora nos permiten ver algunhas das actividades realizadas e das maravillas das Illas Cíes.

Foron días para achegarnos a riqueza natural e paisaxística do parque, de coñecemento da fauna e flora, de aproximación a vida de campamento, de literatura, de estrelas e de cooperación e amizade. Algún día choveu, pero non impediu que disfrutaramos da praia e da totalidade das rutas existentes no parque e, incluso, que rematáramos cunha deliciosa paella de productos do mar. 

Link á galería completa de imaxes

Formación complementaria en inglés na ESO para o vindeiro curso

Segundo a Resolución provisional de 16 de xullo de 2002, da Consellería de Cultura, Educación e Ordenación Universitaria da Xunta de Galicia, o IES Carlos Casares de Viana do Bolo, contará no curso 2012-13, co programa de formación complementaria en inglés (Programa CUALE). No curso pasado desenvolveuse en Bacharelato e, no vindeiro curso, desenvolverase na ESO.

Bachareles 2011-12

O pasado día 14 de xuño de 2012, á tardiña, tivo lugar o acto académico de despedida do alumnado que cursou 2º de Bacharelato, logo de ter pasado as probas de acceso á universidade. Coma sempre foi un acto entrañable onde nos xuntamos alumnado, familias, profesorado actual e antigo e amigos e amigas dos novos e novas Bachareles. Ademáis, en representación do Concello, acompañounos o concelleiro Francisco Aragón, membro do Consello Escolar. O acto foi presidido polo titor de 2º de Bacharelato que, ademais, pronunciou a lección de despedida, Telmo de Paz, a directora do CEIP Bibei, María Luisa Atanes e polo director do IES Carlos Casares, Luis Fernández.

Nota de agradecemento da Fundación Carlos Casares

Recibide o agradecemento da familia Casares Berg e da Fundación Carlos Casares polas cariñosas palabras dedicadas a Kristina Berg na revista Choupín e polo forte sentimento de pesar que está detrás da declaración dos tres días de loito no instituto. Recíbeo como amigo e como director do IES, e por favor faino extensivo  a todo o Claustro e cadro de persoal do centro.

Gustavo Adolfo Garrido
Director- Xerente da Fundación Carlos Casares

Encontro en Madrid cara unha cidanía global

A profesora de educación para a cidadanía e coordinadora de mediación, Susana Fernández Vázquez, e o director do instituto, Luis Fernández López, veñen de participar no V Seminario "Educar para unha cidadanía global", organizado pola Rede de educadores e educadoras para unha cidadanía global. O encontro tivo lugar os días 6, 7 e 8 de xullo, no centro Santa María, da Institución Teresiana, en Los Negrales (Madrid). A actividade foi organizada pola ONG Intermon-Oxfam.

Cita en Barcelona co consumo responsable

Nesta mañá do sábado 7 de xullo, Carlos Ferreiro, Vicedirector do IES Carlos Casares participou como ponente na cidade de Barcelona, no marco das Xornadas de Intercambio de Experiencias Incorporación da Educación para o Desenvolvemento na Educación Formal. O título da experiencia relatada por Carlos foi “Consumiendo en un mundo desigual”, no que se presentou a Unidade Didáctica elaborada por profesorado do noso centro, da U.E. Timoteo Rondales de Bermejo, e do Instituto Bilingüe Rosalía de Castro, de Moscú, co apoio da Escola Galega de Consumo.